ఆంధ్రప్రదేశ్ అసెంబ్లీ ఏడో సెషన్‌లో నాలుగో రోజు సమావేశాలు కొనసాగుతున్నాయి. రాష్ట్రానికి సంబంధించిన పలు కీలక అంశాలపై శాసనసభలో సభ్యులు చర్చిస్తున్నారు. ప్రభుత్వ విధానాలు, అభివృద్ధి కార్యక్రమాలు, ప్రజలకు సంబంధించిన సమస్యలు వంటి అంశాలు సభలో ప్రస్తావనకు వస్తున్నాయి. వివిధ నియోజకవర్గాలకు సంబంధించిన సమస్యలను సభ్యులు ప్రభుత్వం దృష్టికి తీసుకువస్తున్నారు. రాష్ట్ర అభివృద్ధికి సంబంధించిన అంశాలపై ప్రభుత్వం తీసుకుంటున్న చర్యలు, భవిష్యత్ ప్రణాళికలపై కూడా చర్చ జరిగే అవకాశం ఉంది. సమావేశాల సందర్భంగా సభ్యులు లేవనెత్తే అంశాలపై ప్రభుత్వం సమాధానాలు ఇవ్వనుంది.

పంజాబ్‌లోని పాటియాలలో దారుణ ఘటన చోటుచేసుకుంది. అద్దెకు ఇల్లు చూసేందుకు వెళ్లిన ఓ జంటపై పిట్‌బుల్ జాతికి చెందిన శునకం భీకరంగా దాడి చేసింది. ఈ ఘటనలో దంపతులిద్దరూ తీవ్రంగా గాయపడ్డారు. దీనికి సంబంధించిన సీసీటీవీ ఫుటేజ్ సోషల్ మీడియాలో వైరల్ కావడంతో విషయం వెలుగులోకి వచ్చింది. వివరాల్లోకి వెళితే.. అంకిత్ సబర్వాల్, అతని భార్య షిఫాలీ మంగళవారం సాయంత్రం పాటియాలలోని ఘుమాన్ నగర్ ప్రాంతంలో ఓ ప్రాపర్టీ డీలర్‌తో కలిసి అద్దె ఇల్లు చూసేందుకు వెళ్లారు. వారు ఇంటి గేటు తెరవగానే, లోపలి నుంచి పిట్‌బుల్ ఒక్కసారిగా బయటకు దూసుకొచ్చింది. మొదట షిఫాలీపై దాడి చేసి తీవ్రంగా గాయపరిచింది. భార్యను రక్షించే ప్రయత్నంలో అంకిత్‌పైనా ఆ కుక్క దాడి చేసింది. అతని కాళ్లు, వీపుపై గాయాలయ్యాయి. వారి అరుపులు విన్న స్థానికులు కర్రలతో వచ్చి కుక్కను తరిమివేయడంతో వారు ప్రాణాలతో బయటపడ్డారు. ఈ దాడిలో షిఫాలీకి అయిన గాయాలు తీవ్రంగా ఉండటంతో ఆమెకు సర్జరీ చేయాల్సి వచ్చింది. ప్రస్తుతం ఇద్దరూ ఓ ప్రైవేట్ ఆసుపత్రిలో చికిత్స పొందుతున్నారు. ఈ ఘటనపై పోలీసులు స్పందించారు. జంతువుల విషయంలో నిర్లక్ష్యంగా వ్యవహరించినందుకు యజమానిపై భారతీయ న్యాయ సంహితలోని సెక్షన్ 291 కింద ఎఫ్ఐఆర్ నమోదు చేసిన‌ట్లు తెలిపారు. దూకుడు స్వభావం ఉన్న శునకాలను పెంచుకోవడంపై ఆంక్షలు ఉన్నాయని మున్సిపల్ అధికారులు పేర్కొన్నారు.

ఆంధ్రప్రదేశ్ రాజధాని అమరావతి నిర్మాణంలో మరో కీలక ఘట్టం ఆవిష్కృతం కానుంది. రాజధానికి జీవనాడి లాంటి సీడ్ యాక్సెస్ రోడ్డు ప్రారంభోత్సవానికి సర్వం సిద్ధమైంది. ముఖ్యమంత్రి నారా చంద్రబాబు నాయుడు నేడు (గురువారం) ఈ రహదారిని లాంఛనంగా ప్రారంభించనున్నారు. రాజధాని అభివృద్ధిలో ఈ రహదారి అత్యంత కీలకం కానుండటంతో ఈ కార్యక్రమానికి ప్రాధాన్యం ఏర్పడింది. ఈ రోడ్డు ప్రారంభోత్సవంతో పాటు, రాజధానిలో నిర్మించిన రెండు స్టీల్ బ్రిడ్జిలను కూడా సీఎం ప్రారంభిస్తారు. అనంతరం ఇదే మార్గంలో రాయపూడి వరకు ప్రయాణించి, అక్కడ సిద్ధమైన ఎమ్మెల్యే, ఎమ్మెల్సీ క్వార్టర్ల తాళాలను అందుకుని, వాటిని సాధారణ పరిపాలన విభాగానికి (జీఏడీ) అప్పగిస్తారు. ఒకే రోజు మూడు కీలక కార్యక్రమాలు జరగనుండటం, ప్రభుత్వ భవనాలు ఒక్కొక్కటిగా అందుబాటులోకి వస్తుండటంతో రాజధాని గ్రామాల్లో సందడి నెలకొంది. అమరావతి రోడ్ల అనుసంధానంలో సీడ్ యాక్సెస్ రోడ్డు అత్యంత కీలకం కానుంది. మొత్తం 21.77 కిలోమీటర్ల పొడవుతో 9 లేన్ల రహదారిగా దీన్ని నిర్మిస్తున్నారు. మధ్యలో బీఆర్టీఎస్ కారిడార్, ఇరువైపులా 11 మీటర్ల వెడల్పుతో సర్వీస్ రోడ్లు కూడా ఉంటాయి. రాజధానిలోని ఉత్తరం-దక్షిణం వైపు వెళ్లే N1 నుంచి N17 వరకు ఉన్న రోడ్లన్నీ ఈ సీడ్ యాక్సెస్ రోడ్డుకు అనుసంధానం అవుతాయి. ఈ రోడ్డును మూడు దశల్లో నిర్మిస్తున్నారు. మొదటి దశలో దొండపాడు నుంచి వెంకటపాలెం వరకు పనులు చేపట్టారు. రెండో దశలోనే ఉండవల్లి వద్ద బకింగ్‌హామ్ కాలువపై 110 మీటర్ల స్టీల్ బ్రిడ్జి, కొండవీటి వాగుపై 280 మీటర్ల స్టీల్ బ్రిడ్జి నిర్మాణాలను పూర్తి చేశారు. ఈ రహదారి దొండపాడు నుంచి తాడేపల్లి వద్ద జాతీయ రహదారి-16ను కలుపుతూ రాజధాని ప్రగతికి రాచబాట వేయనుంది.

జొమాటో, స్విగ్గీ, ఓలా, ఉబర్, బ్లింకిట్ వంటి సంస్థలలో సేవలందిస్తున్న గిగ్ వర్కర్లు (ప్లాట్‌ఫామ్ వర్కర్లు) ఇకపై తమ పదవీ విరమణ అవసరాల కోసం సులభంగా పొదుపు చేసుకోవచ్చు. కేవలం రూ. 99 కనీస మొత్తంతో జాతీయ పింఛను పథకంలో (ఎన్‌పీఎస్) చేరే అవకాశాన్ని కల్పిస్తున్నట్లు పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (పీఎఫ్ఆర్‌డీఏ) బుధవారం వెల్లడించింది. ఈ మేరకు సామాజిక మాధ్యమం 'ఎక్స్' వేదికగా ఒక ప్రకటన విడుదల చేసింది. 'మీ పని తర్వాతి బుకింగ్‌పై ఆధారపడి ఉండవచ్చు, కానీ మీ రిటైర్మెంట్ అలా కాదు' అని పీఎఫ్ఆర్‌డీఏ పేర్కొంది. గిగ్ వర్కర్ల కోసం ప్రత్యేకంగా రూపొందించిన ఈ ఎన్‌పీఎస్ విధానంలో, కనీస లేదా గరిష్ఠ పరిమితుల నిబంధనలు లేకుండా తమ వెసులుబాటును బట్టి పొదుపు చేసుకోవచ్చని స్పష్టం చేసింది. గతేడాది అక్టోబర్ 29న పీఎఫ్ఆర్‌డీఏ జారీ చేసిన సర్క్యులర్ ద్వారా 'ఎన్‌పీఎస్ ఈ-శ్రామిక్ (ప్లాట్‌ఫామ్ సర్వీస్ పార్ట్‌నర్) మోడల్'ను ప్రవేశపెట్టింది. దీని ప్రకారం, డిజిటల్ ప్లాట్‌ఫామ్‌ల ద్వారా సేవలు అందించే గిగ్ వర్కర్లు ఈ పథకంలో చేరవచ్చు. ఇందులో వర్కర్, యాజమాన్యం కలిసి లేదా విడివిడిగా తమ వాటాలను చెల్లించవచ్చు. ప్లాట్‌ఫామ్ కంపెనీలు నేరుగా పీఎఫ్ఆర్‌డీఏలో నమోదు కాకుండా, పాయింట్స్ ఆఫ్ ప్రెజెన్స్ (PoPs) సంస్థలతో ఒప్పందం కుదుర్చుకుని తమ వర్కర్లను ఎన్‌పీఎస్‌లో చేర్పించవచ్చు. ఆధార్ ఆధారిత ఈ-కేవైసీ ద్వారా వర్కర్ వివరాలను సేకరించి, వారి అనుమతితో పర్మినెంట్ రిటైర్మెంట్ అకౌంట్ నంబర్ (ప్రాన్) కేటాయిస్తారు. ప్రారంభంలో ప్లాట్‌ఫామ్ కంపెనీయే ఇన్వెస్ట్‌మెంట్ స్కీమ్, పెన్షన్ ఫండ్‌ను ఎంపిక చేసినప్పటికీ, తదుపరి కాలంలో ఉద్యోగి తన ఇష్టానుసారం వాటిని మార్చుకునే సౌలభ్యం ఉంటుంది. అస్థిర ఆదాయం కలిగిన గిగ్ వర్కర్లను పదవీ విరమణ పొదుపు పథకాల పరిధిలోకి తీసుకురావడమే ఈ నిర్ణయం వెనుక ఉన్న ప్రధాన ఉద్దేశం.